Føroyskur matur við til Íslands

 

Fiskur

Ikki er neyðugt at søkja um heimild til at flyta inn fisk til Íslands.

 

Kjøt

Viðmælt er at søkja í góðari tíð, helst nakrar vikur áðrenn fráferð til Íslands.

Tey, ið ynskja at flyta kjøt til Íslands, mugu í hvørjum einstøkum føri søkja um loyvi frá íslendska Atvinnuvega- og nýsköpunarráðuneytið og frá Heilsufrøðiligu Starvsstovuni.

Fyrst skal umsókn sendast til Atvinnuvega- og nýsköpunarráðuneytið, Trýst her fyri at fáa umsóknaroyðublað. Umsóknin skal sendast til postur@anr.is.

Minst til at skriva, hvat slag av kjøti (feskt, turt ella ræst), talan er um. Ein persónur, barn ella vaksin, kann í mesta lagi taka 10 kg við sær.

Á linjuna ”Tilgangur innflutnings”, skal skrivast ”Til einkaneyslu”. GG: Navnið á umsøkjara skal vera tað sama, sum hjá tí, ið tekur kjøtið við sær. Eru fleiri ferðandi saman, ber til at senda fleiri umsóknir á 10 kg. Upplýsast skal um farið verður við flogfari ella við Norrönu og eisini hvønn dag, kjøtið kemur til Íslands. Verður umsóknin góðkend, verður heimild send í telduposti og vanligum posti.

Harumframt skal ein eigaraváttan fyllast út og latast Heilsufrøðiligu Starvsstovuni. Tann, sum selur kjøtið, fyllir út eigaraváttanina, ið fæst her. Her skal navnið á viðkomandi seljara og hagaparti ella trøð, haðani kjøtið stavar, upplýsast, eins og nøgd av kjøti og viðgerðarháttur.

Tá seljarin hevur fylt út eigaraváttanina, skal hon sendast til Heilsufrøðiligu Starvsstovu á hfs@hfs.fo og birnam@hfs.fo. Birna Mørkøre, landsdjóralækni, tekur sær av tílíkum umsóknum. Hóast fleiri umsóknir verða sendar til Atvinnuvega- og nýsköpunarráðuneytið, er bert neyðugt at senda eina eigaraváttan, og nóg mikið er at skriva eitt navn, og so +/plus 1 ella fleiri fólk.

Ikki er neyðugt at bíða eftir heimild frá Atvinnuvega- og nýsköpunarráðuneytinum, áðrenn umsókn/eigarváttan verður send til Heilsufrøðiligu Starvsstovuna. Gott er at boða Heilsufrøðiligu Starvsstovuni frá, at umsókn er send til Atvinnuvega- og nýsköpunarráðuneytið.

Loyvið frá Heilsufrøðiligu Starvsstovuni kostar 170 kr., og skal gjaldast á kontu í BankNordik 6460-000.992.765.6, áðrenn loyvið verður útflýggjað.

Tann ferðandi skal syrgja fyri, at bæði váttanin frá Heilsufrøðiligu starvsstovuni og heimildin frá Atvinnuvega- og nýsköpunarráðuneytinum, fylgja við kjøtinum á ferðini til Íslands. Heilsuváttanin frá Heilsufrøðiligu Starvsstovuni skal vera í frumriti.

Um onkrum tørvar hjálp við hesum, kann viðkomandi altíð venda sær til Sendistovu Føroya í Reykjavík.