Musikkskúlaskipanin

Musikkskúlaskipanin hevur sum uppgávu at menna og samskipa musikkskúlaundirvísing kring landið.

Bygnaður
Landsstýrið hevur sett ein leiðara at samskipa og at hava fakligu og námsfrøðiligu ábyrgdina av musikkskúlaundirvísingini. Lærararnir eru settir í skipanini og skulu hava útbúgving frá musikkkonservatorium ella aðra hægri tónleikaútbúgving.

Lærararnir starvast runt landið, og tær kommunur, ið hava musikkskúla, rinda helvtina av læraralønunum, og landið rindar hina helvtina.

Kommunan skipar karmar um undirvísingina við hølum og ljóðførum, og setir ein leiðara á staðnum at hava umsitingarligu ábyrgdina mótvegis kommununi.

Musikkskúlaskipanin, tvs landið, rindar ferðing millum undirvísingarstøðini og avgreiðir lønarútgjaldingar.

Føroya Musikklærarafelag hevur sáttmála við Fíggjarmálaráðið.

Næmingagjald
verður goldið til tann kommunala musikkskúlan. Áseting av gjaldinum skal góðkennast av Musikkskúlaskipanini undir Mentamálaráðnum.

Mál og virðisgrundarlag
Undirvísingin er fyri øll og undirvíst verður í flestu ljóðførum - innan ymisk tónleikasløg. Roynt verður at taka støði í einstaklinginum, og undirvísingin verður skipað soleiðis, at hon kann eggja til eitt ríkt og fjøltáttað tónleikalív á staðnum og í landinum yvirhøvur. Dentur verður lagdur á samanspæl innan siðabundnan eins og nýggjari tónleik.

Slóð
Musikkskúlin

undefined